عباس لیسانی
بیرگون حسین لر ، حسن لر،آیت لر،بهروزلار،علیرضالار،غلام رضالار،... وبوگون سعید لر،دئمک یولچولار چئشیدلی اولسادا یول بیر یولدور و او یالنیز کوتله وی و اؤلکه وی آذربایجانین اؤزگورلوگه دوغرو گئدن یولودور .
یول دوام ائدیر نییه کی سارسیلماز یولچولار بوتون ائنیش یوققوشلاری آشاراق یولا دوام ائدیرلر. بللی دیرکی یول ساده و سیرادان بیر یول دئییل،اؤزللیکله یاشام شوشه سینی سارسیلماز یولچولارین قارانلیق ساراینا چاتماسی ایله سینیب داغیلماقدا گؤره ن دئو(فارس شونیزمی)
بوتون یاراق یاساقلارین دئوره یه کئچیریب تا دارسیقال یوللاردا جانین اوووجونا آلیب ایره للمه یه دوام ائدن قهرمانلاری دوردورسون.
توزاخلار سَریر،بوسقولار قورور،داشلار دیغیرلادیر، آسیر- باسیر – کسیر آنجاق یئنه اؤزگورلوک ائلچیلری دورمادان قوتسال آماجا دوغرو آددیملارین داها گوجلندیریرلر.
نه ایسه قارانلیق گوجلری ده دینج اوتورماییرلار، یوکسک باراژلارلا دورمایان اؤزگورلوک آخینین دیققتله بؤیوده ج آلتینا آلیر و آراشدیریرلار.
نه یازیق کی آرادیقلارین بعضی لرده تاپیب سئوینجدن هالایلار قوشورلار،قارانلیق سئودالیسی اولان بایقوشلار بانلایاراق شوم قاه قاهالار چکیرلر قیناماق اولماز نییه کی آتار داماری بولموشلار "ایچدن بوشالتماق" نئجه اولاجاقدیر بو آلچاق اویون؟! ، آماج ندیر؟ یولچولاری دوردورماق اولمورسا یولدان جایدیرماق!، نئجه اولابیلر؟ .
وآختاردیلار یولچولار آرا؛ قورخاق، سست عنصر،ضعیف النفس، اینامسیز،قیسقانج، آنجاق جاه طلب شخصلری، و بو آماجلا چئشیدلی چالیشقانلارلا ایلگیلر قورلدو اوخلارینین چوخو داشا ده یدی آنجاق آرا سیرا باشاردیلار و شوم اویون باشلاندی؛ دانیشدیرما ،دادیزدیرما،داریخدیرما- ائله کی بوتون یولاقلاری سینادیلار و ایچیمیزدن سئچیلن و بعضآ ائیتیم گؤرن شخصلرله گیزملی بیر جیبهه یاراتدیلار،قارانلییق ائلچی سی اولان قارا جیبهه!.
گؤره و ندیر؟!، سارسیلماز موباریزلر آرا تفرقه سالماق- سلیقه ایختیلافلارین درینلتمک،موباریزه پرنسیپ و ده یرلرین قارانلیغین ایسته دیگی آماجلارا اویغون یازیب یوزماق، او جومله دن:قورخو، اینفیعال و پاسیویزمی، عقلانییت- دایانیش، دیره نیش و جسارتی، غیر عقلانی و غیر مدنی داورانیش!- اؤزگورلوک اوغروندا هر تورلو هزینه نی، حیماقت- پرده آرخاسیندا اولان معامله نین آدین دیالوگ و تعامل- بوتون هژمونیک ایمکانلارا مالیک اولان شوونیزم عامیللریله بیر چاتی آلتیندا ایشلمگی قانون گرالیق(سانکی بو گونه دک بوتون چالیشمالار غیر قانونی ایمیش)- اؤره کدن چالیشان، حرکتین چوخونلوغونوتشکیل ائدن و ایللر بویو میللی حرکتی بؤیوک باشاریلارا اوغرادان میللی حرکتین موتورو اولان گنج و سیّال (ایستیبدادی و توتالیتر فضانین ایقتیضاسی) چالیشقانلاری ،آرالیق و کوچه بازار میللتچیلری( بو چیرکین ایفاده لر تاسفله بعضآ صاف دویغولو گنجلرده ایشکنجه لرین باشارامادیغی منفی ائتگیلری قویور) آدلاندیردیلار– شوونیزمین ایچگین عامیللرین میللی حرکته بیر قورتاریجی کیمی تانیتدیریب و تحمیل ائتمک و بو ایشلرله میللی حرکتده ایللر بویو قارا گوجلرین آرزیسی اولان مووازی جریانین یارانماسینا یول هامارلایان و بئله لیکله سارسیلماز موباریزلره تلقین ائتمک کی:سیز اؤزلوگوزده هئچ سینیز گره ک رسمی بیریسی سیزینله اولا تا ساییلاسیز. بونونلا اؤز گووه ن و اعتماد به نفسی میللی موباریزلردن آلماقلا ایچدن پیچالتماق پروژه سی داها مورکب اویونلارلا دوام ائدیر ، او جومله دن: ایشی ائیله آپاریبلارکی میللی ده ییرلری گوزه آلیب یولا دوشنلر آددیملارین آتاندا شوونیزمین دوستاغین و ایشکنجه لرین یوخ بلکه اؤزوموزده ن گؤرونوب اؤزگه قوللوغوندا اولانلارین چیرکین اویونلارین دوشونورلر.
قوشقوسوزکی گونئی آذربایجانین قهرمان اوغول- قیزلاری ،اؤزللیکله سعیدلریمیز فارس فاشیزمینین بوتون ایشکنجه لرینه اوستون گلره ک اؤز دایانیشلاری ایله بوتون زنجیرلری قیراجاقلار، آنجاق گؤره سن ایچیمیزده ن آتیلان قارانلیق داشلاریندان قورتارا بیله جکلرمی!!؟؟.
سونوندا اعتیراف ائتملییم کی ایسارتده اولان سیمالاریمیز فرشی لریمیز و سعیدلریمیز یوخ بلکه اصیل ایسارتده اولان بیزلریک!دینج یاشاماق ایسارتینده و چوخ ده یرلری ده بونا قوربان وئریریک.
اوچ سعيد ، اوچ آسلان !
حسن راشدي
اوچ سعيديميز ، اوچ آسلانيميز دمیر حاصارلا آرخاسينداديرلار !
سعيد متين پورون دوستاقلانماسيندان ايكي ايل كئچدي ، ايكي ايلدن چوخدور قيزيل آذربايجانيميزين ، يعني زنگانيميزين آسلاني ميله لر آرخاسيندا نعره چكير ؛ آمما اونون آرخاسيندا باشقا بير آسلان وار !
عطيه خانيم ؛ عطيه خانيم سعيدين يئرين دولدوروب ، آسلانين يئري زنگانيميزدا بوش دئييل ، عطيه آسلانيميز بوردادير ؛ سعيد آسلانيميز شهريميزده يوخسادا عطيه آسلانيميزين نعره سي گلير :
آتا - بابالار دئييب لر : آسلانين ائركك ديشيسي اولماز ، آسلان ، آسلاندير !
سعيد نعيمي ده قفس ده دير ، قفس ميله لري داها ميلّي فعاللاريميزا تانيش بير عنصردور !
دمير ميله لر آرخاسيندان كيتابلار دوغولاجاق آنا ديليميزده ؛ عؤمور بويو اوخوللاريميز و مدرسه لريميزده آنا ديلينده يازيب اوخوماغا حسرت قالساقدا ميلّي ايگيدلريميز دمير مفتيللر قارنيندان آنا ديليميزده كيتابلار دوغدوراجاقلار مكتبلريميز اوچون !
سعيد موغانلي يميز گونوموزون دوروموندان آسيلي اولاراق ديدرگين دوشن موغان جئيرانلاريميز كيمي موغان طبيعتيندن زورلا آيريلدي ، او موغاندان آيريلدي تا يئني بير قانداللا كئفي اولسون ! :
بيرگون مني قانداللاياجاقلار ، كئفيم اولسون
دويستاقلارا پاي يوللاياجاقلار ، كئفيم اولسون
كؤكسومده چوخور باختيما نيسگيل دولاجاقلار ،
كؤلگه مده اؤلوم ياللاياجاقلار ، كئفيم اولسون ..... !
Özgür tutsaqlar
Behbud Qulizadə
Üç Səidlərimiz və Azərəbaycanımız uğruna məhbus düşən bütün vətən evladları bir millətin varlıq səsinin hayxırışıdırlar. Bu liberal əsrdə, özün və özəl çıxarların hərşeydən üstün tutulduğu dönəmdə, Milli varlıq və toplumunun dəyərlərini qoruma uğrunda, mənligini qurban verən insalar o millətin varlığının yaşam nöqtəsidirlər.
Səid Mətinpur, Səid Muğanlı, Səid Nəimi, Bəhmən Araz, Sima Didar, Əlirza Fərşi, Rəsu Bədəli, Hüsen Ronəqi və adların sayamaqla bitirəbilmədigimiz varlıq simbollarımız bizi aydın gələcəyə götürə bilən güclərimizdirllər.
Heç zindan ömür boyu sürməyəcək düşüncəsindəyik. O zindanlara keçıb gedən minlər igidlərimiz olub, olmaqda və olacaqda...
Başı dim-dik düran igidlərimizə eşq olsun diyə Səid Muğanlının Maraqlı bir SMSilə bitirirəm: ‘Mən sevirəm və Zindandayam’.
سعیدلر
شاعیر اسماعیل جمیلی
ائل اوبانین سعادتی سوراغیندا سعیدلر /
یوباز یادین توتساغیندا دوستاغیندا سعیدلر /
داغلار کیمی سایسیز داغا دایانانلار سعیدلر /
ائل گوجونه اؤزگورلویه اینانلار سعیدلر
