ورترئتلر
آغالار ممّداوو
کؤچورن: دانسو جبارلی
«دوشونولورم، دئمهلي، وارام» (باادئرلي فرانس، اوْندوققوزونجو عصر)
ايندي درس دئمهديیيم اونيوئرسيتئتلرين بيرينده، سئمئسترين[سئمئتر: ترم] باشلانغيجيندان بو يانا نئچه آيدير کي، منه قولاق آسمايان طلبه قيزلاردان بيري، بير گون من صينفه گيريب، درسه باشلار-باشلاماز، بلکهده ايلک دفعه اوزومه باخيب، هيجانلا سوروشدو (اونون سوال فورماسيني و اينتوناسيياسيني اولدوغو کيمي چاتديرماق ايستهييرم): «موعليم، سيزي تئلئويزوردا گؤستريبلر؟!»
***
من “homoconnectus”-ام (باغلانان اينسان). مني دوشونورلرسه وارام. سئويلمک اونا گؤره هاميميزين خوشونا گلير. مني گؤرورلرسه، وارام. گؤرونمهیيم گؤرولمهیيمدن آسيليدير. »وار اولماق – قاورانيلماقدير» (بئرکلي، اون يئددينجی عصر). وارليغيم باشقاسيندان آسيليدير.بيز هاميميز بير-بيريميزدن آسيليييق. مندن اوردا-بوردا دانيشيرلارسا وارام. حاقّيمدا يازيرلارسا، مندن سيتات وئريرلرسه[سیتات وئرمک: نقل قول ائتمک، ذیکر ائتمک]، آديمي چکيرلرسه وارام. اس ام اس، ایمئیل، دورتمک، ايسماريج و سایره. آليرامسا وارام. تئلئويزوردا گؤستريليرمسه، وارام. يادا دوشورمسه، وارام.
چونکي اؤزوم-اؤزومله و اؤزوم-اؤزومده وار دئييلم، اولا بيلميرم. تکليکده، تجريدده من – يوخام! وار اولماغيم باشقاسي اوچون، باشقاسي ايله وار اولماقدير. اونا گؤره ده علاقهلريمله اؤيونورم، تئلئفونومون يادداشينداکي مشهور شخصلرين آدلاري ايله، بيرگه شکيل چکديرديیيم تانينميش اينسانلارلا، اونلارلا شخصي گؤروشلريم و خاطيرهلريمله.« منيم چوخلو علاقه لريم وار » – من بو علاقهلرله و بو علاقهلرده وارام. سوسيال شبکهلرده دوستلارينين، فاناتلارينين ساييني سؤيله، دئييم کيمسن. علاقهلريم – گوجومدور.
اونودولاندا يوخ اولورام. باشقاسي ايله وار اولورام. باشقاسي – آللاهيمدير. من اونو يادا سالماسام، منه قنيم اولا بيلر همين او باشقاسي: اونوداراق اؤلدورر. اونودولماماق اوچون من ده اونوتمورام. خاطيرلانماسي اوچون او دا مني اونوتمور. بئلهجه، مهريبان اولوروق. تک قالماق قورخوسوندان ياخين دوست اولوروق. اؤزومو گونده بئش دفعه آللاهين دا يادينا ساليرام. يادداشلاردا قالماق آرزوسو قادين بطنيني مايالاماق عشقي کيميدي. «تيکديم کي، ايزيم قالا».
من ياراديجي اينسانام. «گؤرکملي يازيچي، تانينميش شاعير، مشهور فيلوسوف، پوپوليار موغنني» و بو کيمي پسيخولوژي مئداللاردان بيريني آلماق ايستهييرم. من «تانينميش آدام » آدي آلماق يولوندا زووارام. دؤولتيميزين «شؤهرت» اوردئني وار. يني مشهور اولماغيمي سندلشديره، رسميلشديره ده بيلرم.
«ايت دفترينده آدي اولماماق» ، «بيلهجريدن او ياندا تانينماماق» اوز قاراليغيدي، عاييبدي. ايندي گؤر، بيلهجريدن او ياندا تانينان هئچ بيلهجريده ده تانينماياندان نه قدر دَيرليدير. دونيا شؤهرتليسنسه، دونيالارا دَيرسن. آتالاريميز دا بئله دئييب: «آديني چيخارت، سونرا گئت، اوتور دييرماندا». قئيس ده قورخدو، لئيليني گيزلي عشقله سئومهدي، مجنون کيمي آد چيخاراندان سونرا صحرالارا اوز توتدو.
من اؤلنده ده ياسيما چوخونکوندان چوخ آدام گله جک. بو دا بير معياردير آخي: دفنينده ايشتيراک ائدنلرين سايي و کيمليیي سنين ياراديجيليغينين، علاقهلرينين اؤلچوسودور.
من عاليمم. قاناجاقسيزليغا باخ، نه اولسون کي، سيز فلسفه عاليمي، من ايسه بوتانيکم[بوتانیک: گیاه شناس، بیتکیبیلیمچی]؛ من اؤز مونوقرافييامدا فوتوسينتئز حاديثه سيني آراشديرميشام. سيز گرک ديالئکتيک سينتئز مؤوضوسوندا مقالهنيزده منيم مونوقرافييامي «ايستيفاده ائديلميش ادبيات» سياهيسينا داخيل ائديدينيز…
من قلم اهلييم. توي موغنيسينين کونسئرت وئرمک آدي ايله يئنيجه آلديغي ياخاسي آچيلماميش پالتارلاريني صحنهده، باهالي ماشينلاريني ائفيرده نوماييش ائتديرمهسي مني قيجيقلانديرير، آنجاق اؤزوم يئني کيتابيمين «ايمضا گونو»نو کئچيريرم. تسلليم و آرقومئنتيم [آرقومئنت: دلیل، استدلال] بودور کي، منيم محصولومون مدني (کولتورل) دَيري اؤلچويهگلمز درجهده يوکسکدير شوْو موغنيسينکيندن. گؤزلريميزي دؤيهنک ائدن جانلي هئيکللره، هئيکللشميش اؤلولره، ميللي سیمبللارا، «سياسي مودئللر»ه نيفرت ائديرم، اونلاردان بيرينين يئرينده من اولماديغيما گؤره.
من پوبليسيستم[ایجتیماعی مؤوضوعلار یازاری] . «اَن تانينميش اولماق ياريشي»ندا چئمپيون اولماق اوچون بوتون تانينميشلار حاقيندا آد با آد يازيلار يازيرام، اونلارلا شخصن تانيش اولوب، موصاحيبهلر گؤتورورم کي، هئچ اولماسا همين آداملارين سايي قدر اوخوجوم، تانيشيم، شؤهرتيم اولسون. دلي دئييلم کي، گئديب، مثلا، بالاخانيدا زيبيلليکده چؤرک آختاران اوشاقلاري، گئجهقوندولاردا اوشوين آدسيزلاري دانيشديرام، اونلارين فوتوسونو چکم. اؤزومو پستمودئرن ساييرام، آنجاق «مرکزی» شخصيتلره اوز توتورام.
من توريستم. هينديستاندا اولاندا آوروپالي توريست تاجماحالين شکليني فوتوآپاراتينين يادداشينا کؤچوردو. من بونو باشا دوشمهديم. من آرخامي تاجماحالا چئويريب، فوتوآپاراتيمي ائله بو آوروپالييا وئريب اونا باشا سالديم کي، بيزي – مننن تاجماحالي بيرليکده چکسين. ياشاماق، تاجماحاللا ياشاماق، تاجماحالا ياپيشيب ياشاماق ايستهييرم. قوي، تاجماحال مني ياشاتسين! قوي، «اؤولاددا نوه»م (وار اولماغين داها گوجلو قارانتيياسي!) نئجه بير بابانين نوهسي اولماسي ايله اؤيونسون! تاجماحالاجان گئديب چيخميش بابا!
من تئلئويزييا اهلييم. بو ياخينلاردا دوستوما دئديم: «من صحنهني سئويرم، تاماشاچي آلقيشي مني ياشادير» ؛ «من آپاريجيليغي سئويرم، تئلئويزييا منيم حياتيمدير» . او ايسه پاخيلليغيندان، گؤرون، منه نه لر دئدي: «يانيليرسان، سن هئچ نهيي سئوميرسن، سادهجه وار اولماق ايستهييرسن. سني صحنهدن ده، آپاريجيليقدان دا داها قاليجي وار ائدن باشقا ايمکانلارين يارانسا، درحال او ايمکانلارين داليسينجا گئدهجکسن، صحنه يا دا آپاريجيليق ايشي هئچ يادينا دا دوشمهيهجک. چونکي سن اؤزون يوخسان، اؤزون اؤزباشينا وار اولا بيلميرسن. آلقيشي و ائکراني بونا گؤره ايستهييرسن. سن اونودولان کيمي اؤنجه بدبخت، سونرا دا محو اولاجاقسان!»
من ساده وطنداشام. هامي کيمي من ده تئلئويزورا دورتولمهيه جان آتيرام، هئچ اولماسا مشهور آداملارلا شکيل چکديرمک اوچون سيييليرام. بونون اوچون من ائفيرده حتّي چيي قورباغا اَتي ده يئيه بيلرم. اوغلو آذربایجان نئفت آکادئمیاسینداکي تئراکتين قورباني اولموش آنا گنجه ده آدسيز دؤنگه يه اوغلونون آدي نين وئريلمه ديگي اوچون شيکايتله نير. منيم عميم ده ايکي دونيا موحاريبهسي نين قهرماني اولوب. گؤروم، من ده بير يول تاپيب، اونون آديني کوچه لردن بيرينه، يا دا هئچ اولماسا بارئليئفيني[بارئلیئف: نقش برجسته] دوزلتديريب، ياشاديغي ائوين ديوارينا ووردورا بيلرممي؟ هئچ اولماسا رايونوموزدا سئچيلمک اوچون بئله فورصتي الدن بوراخماق اولماز.
من پاتريوتام[پاتریوت: وطنسئور]. ايميج ماکياژدير. باشقاسي اوچوندور. قادينلارين ماکياژسيز، اؤز اوزلري ايله ائودن چيخماق ايستهمهمهلري کيمي، ائوده تک، اؤزونه نئجه گؤرونمهیين واجيب دئييل، اساس باشقاسينا گؤسترديیين ايميجدير. بوتون دونيا ميقياسلي ياريشلارداکي اوغورلاريميز همين بو ماکياژا خيدمت ائدير. دياسپوراميز «آذربايجاني دونيادا تانيتماق» ، «آذربايجان حقيقتلريني» دونيايا چاتديرماغا چاليشير. چونکي گرک دونيا بيزي تانيسين. بيز دونياني تانيماساق دا اولار. چونکي دونيا – بيز اونو تانيماساق دا وار، آنجاق او بيزي تانيماسا بيز وار اولماريق.
من سياسي حاکيميتدنم. يوخسوللار ائله بيلير کي، من تکجه وار-دؤولت خستهسييم. «بو قدر وار-دؤولتي نئينييهجکلر، ييغيرلار» ، سوالينا جاواب تاپا بيلميرلر. باشا دوشه بيلميرلر کي، من بوردا دوغرودان دا داها وار-دؤولت اوچون اوتورماميشام. باخ، من اؤز پاييما مضمونسوز، معناسيز، ماهيتسيز، ماراقسيز اينسانام. من او ميسکينلري آدام سايماسام دا، آنجاق همين آداملارين منه اوزاقدان حئيران-حئيران تاماشا ائتمکلريندن اورقازميک[اورقازمیک: شهوانی] حظ آليرام. بو، بوتون شرق دئسپوتلارينا[دئسپوت: موطلق حاکیمیت] خاص حاکيميت حظّيدير. وار-دؤولتدن دويماق اولور، وار اولماق آرزوسوندان ايسه يوخ. سيز ده بئله اولاردينيز. نه اوچون؟!
ايندي نه اولسون کي، گلهجکده مني لعنتلهيهجکلر؛ نه اولسون کي، سيز مني سؤيورسونوز. سؤيولورمسه، دئمه لي، وارام!
اونا گؤره کي، سيز ده، من ده عؤمور بويو او قدر باشيباسيق، گؤزوقيپيق، غلبهسيز، اؤزونوتصديقسيز ياشاييريق کي، 40 ياشيندا آدام يئرينه قويولاندا، قالستوکلولار[قالستوک: کراوت] مجليسي، تريبونا، ائفير گؤرنده آغزيميز-اوزوموز اَييلير، اوتوروشوموزو-دوروشوموزو ايتيريريک. باخ، اگر واختيندا منيم رحمتليک قايناتام رسمي تدبيرلرده مني اؤز طبيعي دؤشلريمي گؤسترمهيه قويسايدي، گؤزلريم دوياردي، عوضينده ايندي من سيليکونلو دؤشلريمله جاماعاتا يانيق وئرمز، ياريمآچيق آغزيملا ميلته ساختا اَدا ساتمازديم. و ياخود چاتيلميش قاشلارلا، کرئسلودا[کرئسلو: صندل] آياقلاريمي 120 درجه آچيب اوتورمازديم. اؤزوم ده دويورام کي، خستهيم. آنجاق سيز ده بيزي باشا دوشون کي، بو خستهليیين باعیثکاري بيز اؤزوموز دئييليک. مني زورلا خستهلنديريبلر. ايندي نه اولسون کي، گلهجکده مني لعنتلهيهجکلر؛ نه اولسون کي، سيز مني سؤيورسونوز. سؤيولورمسه، دئمه لي، وارام!
Hiç yorum yok:
Yorum Gönder